Gilas iisa pa sa Indonesia

MANILA, Philippines — Matapos ang mala-king tagumpay kontra sa South Korea, magbabalik ang Gilas Pilipinas para harapin ang Indonesia sa pagpapatuloy ng ikatlo at huling window ng 2021 FIBA Asia Cup Qualifiers sa Clark, Pampanga.

Sakay ng bigating 81-78 upset win sa SoKor, hindi papaawat ang mga Pinoy sa alas-6 ng gabing laban kontra sa Indonesians kahit pa swak na sila sa FIBA Asia Cup na gaganapin sa Jakarta sa Agosto  bunga ng malinis na 4-0 baraha sa Group A.

Bago iyon, magbabakbakan muna ang Japan at Chinese Taipei para sa Group B sa alas-2:30 ng hapon.

May laban ang SoKor (2-1) at Indonesia (1-2) kagabi.

Nauna nang tinalo ng Gilas ang Indonesia noong Pebrero sa unang window ng Qualifiers, 100-70 na ginanap sa kanilang homecourt sa Jakarta.

Pinas naman ang may homecourt advantage  ngayon sa hangaring ma-sweep ang Indons na nasa ilalim ngayon ni dating Gilas coach Rajko Toroman at binabanderahan ni dating PBA import na si Lester Prosper bilang naturalized player.

Nagpalit ng line-up ang Gilas sa pagpasok nina Geo Chiu, Jordan Heading at Lebron Lopez para sa kanilang men’s national team debuts. Papalitan nila sina Javi Gomez De Liano, Mike Nieto at Jaydee Tungcab.

Sasamahan nila sina naturalized player Ange Kouame, Kai Sotto, Isaac Go, Carl Tamayo, Will Navarro, Dwight Ramos, Justine Baltazar, RJ Abarrientos at SJ Belangel na siyang bayani sa panalo sa SoKor matapos itira ang game-winner.

Ang pagpapalit ng line-up ng Gilas ay bahagi ng long-term program na mabigyan ng exposure ang batang koponan at mahasa sila para sa 2023 FIBA World Cup na iho-host ng Pinas kasama ang Japan at Indonesia.

“I don’t think there’s any question that these young guys are going to compete. There is always going to be a question about can our talent stand up to an opponent’s talent or can our lack of experience stand up to the experience of another team, but not their heart and not their desire to fight,” ani head coach at program director Tab Baldwin.

Pagkatapos ng Indonesia, magbabanggaan ulit ang Gilas at SoKor sa Linggo para sa huling araw ng Qualifiers.