Phoenix sa conference finals

DENVER— Hindi nagmintis si Chris Paul at hindi naman napigilan si Devin Booker.

Umabante ang Phoenix Suns sa Western Conference Finals matapos sibakin ang Nuggets sa Game Four, 125-118 na kumumpleto ng four-game sweep sa kanilang semifinal duel.

Ito ang unang conference finals appearance ng Suns matapos ang 11-taon.

“You can ask anybody on this team how has Chris develope your game and everybody’s going to have a lengthy answer because he cares,” ani Booker sa 36-anyos na si Paul.

Humataw si Paul ng 37 points at may 34 markers si Booker para sa 4-0 paglipit ng Phoenix sa Denver sa kanilang best-of-seven semis series na kinanampukan ng pagkakatalsik ni MVP Nikola Jokic dahil sa flagrant foul sa third quarter.

Pinalabas ng court si Jokic matapos ang kanyang hard foul kay Cameron Payne sa 3:52 minuto ng third period kung saan naiwan ang Nuggets sa 76-83.

Mula rito ay hindi na napigilan ang Suns na nauna nang pinatalsik si LeBron James at ang LA Lakers sa first round.

Tumapos si Jokic na may 22 points at 11 rebounds sa loob ng 28 minuto.

Pinamunuan ni Will Barton ang Denver, nahulog sa  13-point deficit papasok sa fourth quarter, sa kanyang 25 points at may 20 at 19 markers sina Michael Porter Jr. at Monte Morris, ayon sa pagkakasunod.

Sa Milwaukee, kumamada si Giannis Antetokounmpo ng 34 points para pamunuan ang Bucks sa 107-96 paggupo sa Brooklyn Nets sa Game Four  na nagtabla sa kanilang serye sa 2-2.

Nakatakda ang Game Five sa Brooklyn bukas.