Eala, Russian partner sa finals ng French Open girls doubles
MANILA, Philippines — Mabilis na dinispatsa nina top seeds Alex Eala at Russian partner Oksana Selekhmeteva sina unseeded Italian duo Eleanora Alvisi at Lisa Pigato, 6-2, 6-2 upang umabante sa finals ng French Open girls’ doubles na ginaganap sa Stade Roland Garros sa Paris, France.
Mainit na sinimulan nina Eala at Selekhmeteva ang kanilang ratsada nang agad kunin ang 4-2 kalamangan sa first set na nagsilbing magandang momentum na nadala nila sa second frame para makuha ang finals slot.
Ibinuhos ni Selekhmeteva ang lakas nito matapos matalo sa kababayang si Erika Andreeva, 6-2, 5-7, 6-7 (0), sa semifinals ng girls’ singles.
Makakaharap nina Eala at Selekhmeteva sa championship round sina Russian Maria Bondarenko at Hunga-rian Amarissa Kiara Tóth na nanaig kina third seeds Victoria Jimenez Kasintseva ng Andorra at Linda Noskova ng Czech Republic, 6-7 (2), 6-2, (10-4), sa hiwalay na semis match.
- Latest
