Training ng PBA teams sa NCR plus Puwede na
MANILA, Philippines — Posibleng makabalik na sa NCR Plus ang mga PBA teams para sa pagpapatuloy ng kanilang paghahanda sa Season 46 kasunod ng bagong resolusyon ng Inter-Agency Task Force (IATF) sa partial reopening ng mga gyms at courts.
Ayon sa pahayag ng IATF kahapon, pinapayagan na ang pagbubukas ng indoor non-contact sports venues sa 30 porsyentong kapasidad na magandang balita para sa pagbabalik-ensayo ng PBA kung sakali.
“Indoor non-contact sports venues with Safety Seal Certifications, such as fitness studios, gyms, skating rinks, and racket sports courts in the National Capital Region Plus areas, shall be allowed to operate at 30% of their venue capacity,” wika ng IATF.
Noong nakaraang Marso pa nagsara ang mga gyms sa NCR Plus nang magbalik sa mahigpit na Enhanced Community Quarantine (ECQ) at Modified ECQ (MECQ) ang quarantine status.
Bumaba noong nakaraang buwan ang NCR Plus sa General Community Quarantine (GCQ) subalit sa ilalim ng dagdag na restrictions kaya’t ipinagbawal muna ang reopening ng recreational venues tulad ng sports courts at gyms.
Sa bagong development na ito ay hihingi ng paglilinaw at abiso ang PBA sa Games and Amusements Board (GAB) para sa detalyadong guidelines, ayon kay Commissioner Willie Marcial, kung puwede na nga talaga sa NCR Plus ang practice ng mga koponan.
Bukod doon ay kakailanganin din ang go-signal ng mga local government units (LGUs) sa NCR Plus kung nasaan ang mga home gyms ng mga PBA teams.
Simula noong nakaraang buwan ay ligtas at matagumpay ang PBA training na susi sa hangarin nilang maituloy ang natenggang 2021 Season sa katapusan ng buwan o sa unang bahagi ng Hulyo.
- Latest
