Mitchell humataw sa Jazz

SALT LAKE CITY — Humataw si star guard Donovan Mitchell ng 37 points para banderahan ang Utah Jazz sa 117-111 paggiba sa Los Angeles Clippers sa Game Two at angkinin ang 2-0 lead sa kanilang Western Confe­rence semifinals series.

Iniskor ni Mitchell ang 27 points sa first half at isinalpak ang mahala­gang driving shot sa hu­ling 43 segundo ng fourth period at dalawang free throws sa nalalabing 10 segundo para selyuhan ang panalo ng Jazz.

Nag-ambag si Fil-Am at NBA Sixth Man of the Year Jordan Clarkson ng 24 points, tampok dito ang anim na 3-pointers habang may 19 markers si Joe Ingles.

Si NBA Defensive Player of the Year Rudy Gobert ay kumolekta ng 13 points at career playoff-high 20 rebounds.

Pinamunuan ni Reggie Jackson ang Clippers sa kanyang 29 points at may 27 at 21 markers sina Paul George at Kawhi Leonard, ayon sa pagkakasunod.

Sa Milwaukee, kumamada si Khris Middleton ng 35 points at may 33 markers si Giannis Antetokounmpo sa 86-83 paglusot ng Bucks sa Brooklyn Nets sa Game Three para idikit sa 1-2 ang kanilang Eastern Conference semifinals duel.

Isang driving layup ang isinalpak ni guard Jrue Holiday sa huling 11.4 segundo para sa 84-83 abante ng Milwaukee kasunod ang mintis na jumper ni Brooklyn guard Bruce Brown sa huling 6.4 segundo.

Ang dalawang free throws ni Middleton sa natitirang 2.1 segundo ang naglayo sa Bucks sa 86-83 at tumalbog naman ang three-point attempt ni Kevin Durant sa panig ng Nets sa pagtunog ng final buzzer.

Pinamunuan ni Durant ang Brooklyn sa kanyang 30 points kasunod ang 22 markers ni Kyrie Irving.