Asian Senior Women’s volleyball Championship sa Pinas na

MANILA, Philippines — Pormal nang ibinigay sa Pilipinas ang hosting rights ng 21st Asian Senior Women’s Volleyball Championship na gaganapin sa Agosto 29- Setyembre 5.

Sa statement ng Asian Volleyball Confederation (AVC), pinangalanan ang Pilipinas bilang host country kapalit ng China na nagdesisyong magpull-out dahil sa coronavirus disease (COVID-19) pandemic.

“The Philippines, which hosted the Asian Senior Women’s Championship twice in 1997 and 2017, received the AVC’s green light to organize the top-tier championship for the third time,” ayon sa AVC.

Idaraos ang mga laro sa isang bubble setup sa Clark sa Pampanga at at Subic, Zambales.

Magsisilbing main venue ang AUF Sports and Center habang pinag-aaralan pa kung alin sa Bren Z. Guiao Convention Center at Subic Bay Gym ang magi-ging se-cond venue.

Titira ang buong de-legasyon sa Quest Hotel.

Lalahok sa torneo ang China, Japan, Thailand, South Korea, Kazakhstan, Chinese-Taipei, Iran, Indonesia, Australia, India at Hong Kong.

Inaasahang madaragdagan pa ito sa oras na makumpleto ang qualifying sa iba’t ibang rehiyon sa Asya. Bilang host, awtomatiko na ang slot ng Pilipinas sa Asian meet na magsisilbing qualifying tournament para sa 2022 FIVB Volleyball Women’s World Championship.

Ito ang unang lalahukan ng bagong buong national team na babanderahan nina middle blockers Jaja Santiago, Aby Maraño at Majoy Baron kasama sina Eya Laure, Mylene Paat, Iris Tolenada, Kamille Cal, Faith Nisperos, Ivy Lacsina, Mhicaela Belen, Dell Palomata at iba pa.