Rower Nievarez kasama sa Olympics

MANILA, Philippines — Umihip ang suwerte pabor sa rower na si Cris Nievarez nang bigyan siya ng World Rowing Federation (WRF) ng tiket para sa 2021 Olympic Games sa Tokyo, Japan bagama’t ninth place lamang ang tinapos nito sa men’s singles sculls sa nakaraang A2021 Asia and Oceania Olympic Continental Qualification Regatta sa Tokyo Bay, Japan.

Nabiyayaan si Nievarez ng Olympic slot matapos bawasan ng WRF ang nakuhang Olympic berths ng Japan at Iran na nanalo sa apat at tatlong events, ayon sa pagkakasunod sa nakaraang Olympic qualifying kung saan top 5 rowers ang papasok sa Tokyo Games.

Ngunit dahil ang ibang kalahok na nakakaangat kay Nievarez ay qualified na  bago pa ang naturang event, nabigyan siya ng Olympic slot.

“Sobrang saya ko po, hindi ko po maipaliwanag, nagulat din po ako,” sabi ng 21-gulang na si Nievarez  na kasalukuyan pang sumasailalim sa 14-day quarantine mula sa Japan.

“We are happy to share that the Philippine Rowing Association (PRA) received confirmation from World Rowing that we have qualified for the Men’s Single Sculls (M1x) for the Tokyo Olympic Games,” anunsiyo ng PRA sa kanilang social media account.

Si Nievarez ang pang-walong Pinoy sa 2021 Tokyo Olympics kung saan makakasama niya sina 2016 Rio de Janeiro Olympics silver medalist Hidilyn Diaz ng weightlifting, Ernest John Obiena ng pole vault, Carlos Edriel Yulo ng gymnastics at Eumir Felix Marcial, Irish Magno, Nesthy Petecio at Carlo Paalam.

“I know that Cris and the entire rowing team worked hard for this. It is well-deserved,” sabi naman ni Philippine Sports Commission (PSC) chairman William ‘Butch’ Ramirez. “The PSC will keep supporting him as much as we can on this quest.”

Laglag ang balikat na umuwi ng Pinas si Nievarez kasama sina 2019 SEA Games gold medalists Joanie Delgaco at Melcah Jen Caballero at ang tambalan nina Zuriel Sumintac at Roque Abala Jr. na ang buong akala ay bigo sila sa kanilang misyon.

Nakabilang si Nievarez sa national team noong 2016 sa edad na 15-anyos at inaasahang makakatulong sa kanya ang parating na Uzbek coach na si Shukrat Ganiev sa paghahanda para sa Tokyo Olympics sa July.

Si Benjamin Tolentino ang huling Pinoy rower na nakapaglaro sa Olympics noong 2000 edition sa Sydney, Australia.