Lakers umiiwas sa play-in
LOS ANGELES — Kumolekta si Anthony Davis ng 42 points at 12 rebounds para banderahan ang nagdedepensang Lakers sa 123-110 pagpapalubog sa Phoenix Suns.
Nagdagdag sina Kentavious Caldwell-Pope at Alex Caruso ng tig-17 points para sa ikatlong panalo ng Lakers (38-30) na nasa No. 7 spot na ngayon sa Western Conference sa ibabaw ng mahigpit nilang kalabang Portland Trail Blazers (39-29) sa awtomatikong playoff berth at lumaki ang tsansang maka-iwas sa play-in tournament. Sa play-in tournament, maglalaban ang No. 7 at No. 8 teams at ang mananalo ang magiging 7th seed sa playoffs habang ang matatalo ay sasagupa sa mananaig sa pagitan ng No. 9 at No. 10 squads para pag-agawan ang pinakahuli at pag-walong plyoff slot.
Pinamunuan ni Cameron Payne ang Suns (48-20) sa kanyang 24 points.
Sa isa pang laro sa L.A., humataw si Derrick Rose ng 25 points para ilapit ang New York Knicks (38-30) sa pagkopo sa playoff berth sa East makaraang agawin ang 106-100 tagumpay sa Clippers (45-23).
Sa Cleveland, pinahigpit ng Dallas Mavericks (40-28) ang paghawak sa fifth place sa West matapos kunin ang 124-97 panalo sa Cavaliers (21-47).
Sa Boston, pinatibay ng Miami Heat (37-31) ang pagkapit sa sixth place sa East nang agawin ang 130-124 panalo sa Celtics (35-33).
Sa Charlotte, binuhay ng New Orleans Pelicans (31-37) ang kanilang tsansang makapasok sa play-in tournament sa West nang ilista ang 112-110 paglusot sa Hornets (33-35).
Sa Detroit, nagposte si Nikola Vucevic ng 29 points at 16 rebounds sa 108-94 pagsuwag ng Chicago Bulls (29-39) sa Pistons (20-49) para sa pag-asang makasama sa play-in tournament sa East.
- Latest