Mandaue kampeon ng VisMin Super Cup-Visayas

MANILA, Philippines — Nakumpleto ng KCS Mandaue Computer Specialists ang Cinderella run nito matapos silatin ang paboritong MJAS Zenith-Talisay Aquastars sa winner-take-all Game 3, 89-75 upang tanghaling kauna-unahang Visayas leg champion ng Chooks-to-Go Pilipinas VisMin Super Cup kamakalawa ng gabi sa Alcantara Civic Center sa Cebu.

Sumandal ang Mandaue sa mainit na 27-11 ratsada sa ikatlong quarter upang makapagtayo ng 61-50 abante papasok sa fourth quarter na pinalawig pa nila hanggang sa 22 puntos tungo sa titulo.

Wagi rin ng P500,000 mula sa title sponsor na Chooks-to-Go ang Mandaue sa pangunguna ni coach Mike Reyes na maghihintay na lamang ng magiging kampeon sa Mindanao leg para sa VisMin Super Cup grand finals sa Lanao Del Norte sa Agosto.

Nagningning para sa Computer Specialists ang lider na si Ping Exciminiano sa naitalang 15 puntos, limang rebounds at tatlong steals upang mapangalanang Finals MVP.

“Sobrang blessed ako, after all na nangyari sa akin, nagka-injury at Achilles injury, nagpapasalamat ako na napunta ako sa ganitong sitwasyon,” ani Exciminiano,na pinayagan ng TNT Katropa na pansamantalang makapaglaro sa Mandaue.