Gilas 3x3 pool tuloy ang naputol na training

MANILA, Philippines — Inaasahang makakasama na si Alvin Pa-saol upang kumpletuhin ang Gilas 3x3 pool kapag nagpatuloy ang bubble training para sa FIBA 3x3 Olympic Qualifying Tournament sa katapusan ng buwan matapos pansamantalang lumabas ng Inspire Sports Academy sa Calamba, Laguna.

Tumigil muna sa ensayo ang Nationals upang asikasuhin ang mga kailangang papeles sa paglipad nila sa Graz, Austria para sa krusyal na Tokyo Olympics qualifiers sa Mayo 26-30.

Kapag ayos na ang mga travel requirements, inaasaahang papasok uli sa bubble ang Gilas 3x3 ngayong linggo kung saan makakasama na nila si Pasaol upang plantsahin ang preparasyon bago umalis ng bansa.

Hindi muna nakasama ang Meralco rookie na si Pasaol bunsod ng pinoproseso pang health and safety protocols sa lagpas isang linggong ensayo ng Gilas sa Clambubble kung saan nauna sina Joshua Munzon, CJ Perez, Mo Tautuaa, Karl Dehesa at Santi Santillan.

Bagama’t wala pa noon si Pasaol ay solido ang ensayo ng Gilas na dalawang beses sa  isang araw, ayon kay Samahang Basketbol ng Pilipinas (SBP) 3x3 program director Ronnie Magsanoc.

“With their commitment and sacrifice, I can say that the players are real-ly all-in,” ani Magsanoc. “The SBP did its part to provide us with everything we needed including a safe training environment in the bubble and the team did its best to maximize the great opportunity to train and be together.”

Sa ngayon Zoom workouts ang ginagawa ng Gilas 3x3 pool habang nasa labas pa para manatiling nasa kundisyon.

Mapapasabak ang Gilas 3x3 sa FIBA 3x3 OQT sa mabigat na Pool C kasama ang France, Slovenia, Qatar at Dominican Republic.