Mavericks No. 5 na sa West
DALLAS — Tumipa si Luka Doncic ng 24 points at 10 rebounds para sa 113-109 pagwawagi ng Mavericks sa Brooklyn Nets at upuan ang No. 5 spot sa Western Conference.
Nagdagdag si Tim Hardaway Jr. ng 23 markers at may 17 points at 8 boards si Dorian Finney-Smith para sa pagpapalasap ng Mavericks (38-28) ng ikaapat na dikit na kamalasan sa Nets (43-24).
Hangad ng Mavericks na direktang makapasok sa playoffs nang hindi na maglalaro pa sa bagong play-in tournament.
Binanderahan ni Kyrie Irving ang Nets sa kanyang 45 points kasunod ang 20 markers ni Kevin Durant habang ito ang ika-16 sunod na laro na nasa bench ang may injury na si James Harden.
Sa Los Angeles, umangat ang Clippers (45-22) sa No. 3 spot sa West matapos kunin ang 118-94 panalo sa nagdedepensang Lakers (37-29).
Pito pang players ang tumipa ng double figures para sa Clippers na nasa ilalim ngayon ng Utah Jazz (48-18) at Phoenix Suns (47-19) kasunod ang Denver Nuggets (44-22).
Sa San Francisco, naglista si Stephen Curry ng 34 points para pangunahan ang 118-97 panalo ng Golden State Warriors (34-33) sa Oklahoma City Thunder (21-46) at umakyat No. 8 seat sa West.
Sa Tampa, Florida, umiskor si Bradley Beal ng 28 points at inilista ni Russell Westbrook ang kanyang ika-34 triple-double sa season sa 131-129 overtime win ng Washington Wizards (31-36) sa Toronto Raptors (27-40).
- Latest