May pag-asa sa Tokyo Olympics ang 2-golfers

MANILA, Philippines — Kailangan pang hintayin nina national lady golfers Yuka Saso at Bianca Pagdanganan ang resulta ng qualification deadline ng golf competition sa Hunyo 22 para sa tsansang makapaglaro sa 2021 Olympic Games.

Sa reallocation reserve list for wo-men ng International Golf Federation (IGF) ay nakapuwesto ang 19-anyos na si Saso sa No. 22 at nakaupo ang 23-gulang na si Pagdanganan sa No. 43.

Ang top 60 players sa buong mundo – dalawang golfers sa bawat bansa – sa men’s at women’s division ang makakapaglaro sa 2021 Olympics sa Tokyo, Japan sa Hulyo 23 hanggang Agosto 8.

Para mapalakas ang kanilang tsansa sa Olympic spot ay kailangan nina Saso at Pagdanganan na mapanatili ang kanilang Olympic golf rankings sa IGF hanggang sa qualification deadline sa Hunyo 22.

Naniniwala ang National Golf Association of the Philippines (NGAP) na makukuha nina Saso at Pagdanganan ang dalawang Olympic ticket.

Kumakampanya si Saso sa Japan LPGA Tour kung saan siya nagbulsa ng dalawang titulo matapos maging professional golfer noong nakaraang taon. Sumasabak naman si Pagdanganan sa US LPGA at sumali sa nakaraang Women’s PGA Championship sa Pennsylvania.

Muling ibinilang ang golf event sa sports calendar ng Olympics noong 2016 sa Rio de Janeiro, Brazil kung saan pumalo si Pinoy bet Miguel Tabuena sa men’s category.