Macrohon may 2-bronze

MANILA, Philippines — Patuloy ang pagbuhat ng mga national weightlifters ng medalya sa Asian Weightlifting Championships sa Tashkent, Uzbekistan.

Dalawang bronze me-dals ang inangkin ni 2019 Southeast Asian Games gold medalist Kristel Macrohon sa women’s 76 kilogram category matapos maglista ng 225kg na total lift at 125kg sa clean and jerk. Sa snatch ay nagtala lamang ang 24-anyos na si Macrohon ng 99kg.

Si Zhang Wangli ng China ang umangkin sa tatlong gold medal sa kanyang mga binuhat na 115kg sa snatch, 148kg sa clean and jerk at total lift na 263kg.

Umabot na sa 11 ang medalyang nakamit ng Team Philippines sa nasabing torneo na isa ring qualifying event para sa 2021 Olympic Games sa Tokyo, Japan sa Hulyo 23 hanggang Agosto 8.

Tampok dito ang dalawang gintong medalya ni weightlifting prodigy Vanessa Sarno sa wo-men’s 71kg habang tatlong silver ang sinikwat ni Mary Flor Diaz sa women’s 45kg class.

May dalawang silver at isang bronze medal naman si Elreen Ando sa women’s 64kg cate-gory ng nasabing Asian meet kung saan pormal na inangkin ni 2016 Rio de Janeiro Olympics silver medalist Hidilyn Diaz ang tiket para sa Tokyo Olympic Games.

Walang nakamit na medalya ang 30-anyos na si Diaz sa women’s 55kg division matapos pumang-apat.

Sinabi ni Samahang Weightlifting ng Pilipinas (SWP) president Monico Puentevella na ang nasabing torneo ay bahagi ng kanilang preparasyon para sa 2021 SEA Games sa Hanoi, Vietnam sa Nobyembre 21 hanggang Disyembre 2.

Noong 2019 SEA Games ay kumolekta ang mga national lifters ng kabuuang dalawang gold, tatlong silver at dalawang bronze medals.