Ancajas 5-buwan ang paghahanda

MANILA, Philippines — Limang buwan ang magiging preparasyon ni Filipino world champion Jerwin Ancajas para sa muli niyang pagdedepensa sa suot na super flyweight crown sa ika-10 na sunod na pagkakataon.

Tinalo ni Ancajas si Mexican challenger Jonathan Javier Rodriguez via unanimous decision para ma-panatiling hawak ang International Boxing Federation (IBF) belt noong Abril 10 sa Mohegan Sun Arena sa Uncasville, Connecticut.

Magkakasamang bumalik sa Pilipinas noong Martes ng umaga sina Ancajas, Olympic Games-bound Eumir Felix Marcial, sparring partner Jonas Sultan at trainer/manager Joven Jimenez mula sa United States.

Ayon kay MP Promotions president Sean Gibbons, posibleng sa Setyembre o Oktubre magbabalik sa ibabaw ng boxing ring ang 29-anyos na si Ancajas (33-1-2, 22 knockouts).

Ang panalo kay Rodriguez ang unang laban ni Ancajas matapos noong Disyembre 7, 2019 kung saan tinalo niya si Miguel Gonzalez via sixth-round TKO.

Isa si dating World Boxing Council (WBC) super flyweight titlist Srisaket Sor Rungvisai (50-5-1, 43 KOs) ng Thailand sa mga tinitingnan ni Gibbons na puwedeng makasagupa ni Ancajas.

Samantala, inaasahan namang magtutungo ang middleweight na si Marcial sa training camp ng Association of Boxing Alliances in the Philippines (ABAP) sa Thailand para makasama sina Olympic qualifiers Irish Magno, Nesthy Petecio at Carlo Paalam sa paghahanda sa 2021 Olympics sa Tokyo, Japan.

Nagsanay ang 24-anyos na si Marcial sa ilalim ni Hall of Fame trainer Freddie Roach sa Wild Card Boxing Gym sa Hollywood, California bilang isang professional boxer.