Sotto lalaro pa rin sa gilas, sasabak din sa Australia
MANILA, Philippines — Sa Australia na ipagpapatuloy ni Kai Sotto ang kanyang career matapos pumirma sa Adelaide 36ers ng prestihiyosong National Basketball League (NBL).
Inanunsyo ng kampo ni Sotto, sa pangunguna nina Patty Scott ng East West Private (EWP) at agent Joel Bell, ang pagpirma ng 7-foot-2 Filipino teen sensation sa 36ers kahapon na bagong ruta niya papuntang NBA.
Sa parehong presser, siniguro din ni Sotto ang mu-ling paglalaro niya sa Gilas Pilipinas sa FIBA Olympic Qualifying Tournament sa Serbia sa Hunyo gayundin sa FIBA Asia Cup sa Indonesia sa Agosto habang tini-tingnan pa kung makakasalang siya sa huling window ng FIBA Asia Cup Qualifiers sa Clark, Pampanga.
Ikinatuwa ito nina Samahang Basketbol ng Pilipinas at Smart president Al Panlilio at program director Tab Baldwin na suportado ang bagong kabanata sa career ng Filipino NBA hope sa Australia.
Inanunsyo rin nina Panlilio at Smart senior vice president Jane Basas ang pagsikwat kay Sotto bilang pinakabagong Smart brand ambassador at nakalinya na ang mga proyekto para sa kanya ngayong taon.
“Mixed emotions ito lahat para sa akin. Sobrang excited na masaya na kinakabahan. But I promise to continue developing and improving to stay ready for the challenges ahead,” ani Sotto sa press conference na inorganisa ng Smart.
Multi-year deal ang kontrata ni Sotto sa Adelaide na may option sa ikatlong season sa ilalim ng NBL Special Restricted Player provision simula sa 2021-2022 Season sa Oktubre.
Masigabong sinalubong ng Adelaide, sa pangunguna nina head coach Conner Henry at general manager Jeff Van Groningen ang 18-anyos na Pinoy prodigy.
“Kai realises that he has work ahead of him as all rookies do when coming in to this tough league, but his combination of height and developing skill-set gives him every chance to raise his game. With hard work, his ceiling for growth is very high,” ani Groningen.
Bagong simula ito para kay Sotto matapos ang paghihiwalay nila ng NBA G-League at Ignite kamakailan lang. Miyembro si Sotto ng eksklusibong development team ng mga teen prospects sa buong mundo sa ilalim ng G League program patungo sa NBA.
- Latest
