Lakers iginupo ang Jazz
LOS ANGELES — Isinalpak ni guard Dennis Schröder ang panablang tira para makahirit ng overtime at tumapos na may 25 points sa 127-115 paggupo ng nagdedepensang Lakers sa Utah Jazz.
Naikonekta ni Schröder ang kanyang layup sa huling tatlong segundo sa regulation para itabla ang Lakers (35-22) sa 110-110 patungo sa overtime laban sa Jazz (42-15).
Humakot si center Andre Drummond ng 27 points kasunod ang 25 markers ni Kentavious Caldwell-Pope para sa Los Angeles na naisuko ang 14-point lead sa fourth bago dominahin ang Utah sa extra period, 17-5.
Naglaro ang NBA-leading Jazz na wala sina injured starters Donovan Mitchell, Mike Conley at Rudy Gobert at nakahugot kay FilA-Am Jordan Clarkson ng 27 points.
Nag-ambag si Ersan Ilyasova ng season-high 20 points at may 20 points at career-high-tying 14 assists si Joe Ingles.
Sa Washington, inilista ni Russell Westbrook ang kanyang ika-25 triple-double sa season habang may 37 points si Bradley Beal para ihatid ang Wizards (23-33) sa 121-100 paglampaso sa Detroit Pistons (17-40).
Tumapos si Westbrook na may 15 points, 14 rebounds at 11 assists.
Sa Milwaukee, tumipa si Grayson Allen ng 26 points tampok ang pitong triples para akayin ang Memphis Grizzlies (29-26) sa 128-115 pagpulutan sa Bucks (35-21).
- Latest
