76ers sinamantala ang kahinaan ng Nets

PHILADELPHIA — Sinamantala ng 76ers ang hindi paglalaro ng mga starters ng Brooklyn Nets para kunin ang 123-117 panalo sa duwelo ng dalawang top teams sa Eastern Conference.

Humakot si Joel Embiid ng 39 points at 13 rebounds habang may 17 markers si Ben Simmons para sa Philadelphia (36-17) na inangkin ang No. 1 seat sa Eastern Conference. Ipinahinga ng Brooklyn (37-18) sina starters James Harden, Kevin Durant, Blake Griffin at LaMarcus Aldridge.

Umiskor si Kyrie Irving ng 37 points sa panig ng Nets na nakaba-ngon mula sa 22-point deficit sa likod ng kanilang mga reserves para makadikit sa 115-118 agwat sa huling 1:15 minuto ng fourth period.

Tinulungan naman nina Embiid at Simmons ang 76ers na muling makalayo sa huling minuto ng laban para kunin ang panalo.

Sa Minneapolis, naglista si Khris Middleton ng 27 points, 8 rebounds at 7 assists para pamunuan ang Milwaukee Bucks (34-20) sa 130-105 pagbugbog sa Minnesota Timberwolves (14-42).

Ito ang ikaanim na sunod na laro na hindi nakita sa aksyon si Giannis Antetokounmpo (pananakit ng kaliwang tuhod) para sa Milwaukee.

Sa Detroit, isinalpak ni Reggie Jackson ang isang jumper sa huling 2.3 segundo para sa 100-98 pagtakas ng Los Angeles Clippers (39-18) sa Pistons (16-39).

Sa Oklahoma City, humugot si Stephen Curry ng 25 sa kanyang 42 points sa third quarter para pamunuan ang 147-109 pagmasaker ng Golden State Warriors (27-28) sa Thunder (20-35).

Sa Tampa, Florida, tumipa si OG Anunoby ng 22 points kasunod ng 20 markers ni Pascal Siakam para igiya ang Toronto Raptors (22-34) sa 117-112 pagdaig sa San Antonio Spurs (26-27).