Nets dinurog ang Wolves sa pagbibida ni Durant

MINNEAPOLIS — Humataw si Kevin Durant ng 31 points para pangunahan ang Brooklyn Nets sa 127-97 pagpulutan sa Minnesota Timberwolves sa larong naurong dahil sa pamamaril sa isang ‘black man’ kamakalawa.

Nagsalpak si Durant ng 11-for-15 fieldgoal shooting sa kanyang pinakamagandang laro sa nakalipas na dalawa’t kalahating buwan para sa Nets (37-17) na nagtala ng 31 assists.

Hindi nakita si Durant sa loob ng 23 games dahil sa kanyang strained hamstring bago nakabalik sa aksyon noong nakaraang linggo.

Nagdagdag si Joe Harris ng 23 points para sa Brooklyn na hindi nakuha ang serbisyo nina James Harden (napuwersang hamstring), Kyrie Irving (personal na dahilan) at LaMarcus Aldridge (may kinalaman sa COVID-19 protocol).

Umiskor si Anthony Edwards ng 27 points sa panig ng Timberwolves (14-41) na nabaon sa 45-point deficit sa  fourth period.

Sa Salt Lake City, tumipa si Bojan Bogdanovic ng 23 points at may 22 markers si Donovan Mitchell para sa 106-96 pagdaig ng Utah Jazz (41-14) sa Oklahoma City Thunder (20-34).

Humakot si center Rudy Gobert ng 13 points, 14 rebounds at 7 blocks para sa Jazz na ipinalasap ang pang-pitong sunod na kamalasan sa Thunder.

Sa Charlotte, kumamada si Kyle Kuzma ng 24 points para banderahan ang nagdedepensang Los Angeles Lakers (34-21) sa 101-93 panalo sa Hornets (27-26).

Sa Indianapolis, nag-hulog si Paul George ng 36 points para pamunuan ang Los Angeles Clippers (38-18) sa 126-115 pagpapatumba sa Indiana Pacers (25-28).