Fernandez tiwala sa Philippine SEAG athletes

MANILA, Philippines — Bagama’t naantala ang preparasyon dahil sa COVID-19 pandemic ay naniniwala si Chef De Mission Ramon Fernandez na lalaban pa rin para sa overall crown ang Team Philippines sa 31st Southeast Asian Games.

Ayon kay Fernandez, sapat na ang tatlong buwan upang makuha ng mga national athletes ang kanilang magandang kondisyon para sa pagdedepensa ng SEA Games crown. “Three months would really be enough for them to perform still at their peak or at their very best,” ani Fernandez, isa sa mga Commissioner ng Philippine Sports Commision (PSC).

Idaraos ang 2021 SEA Games sa Hanoi, Vietnam sa Nobyembre 21 hanggang Disyembre 2.

Kabuuang 626 atleta ang magsusuot ng uniporme ng Team Philippines para sa pagtatanggol sa titulo sa biennial event na huling ginanap dito sa bansa noong Disyembre ng 2019.

Binuo ang PSC-Philippine Olympic Commission (POC) Task Force para pangunahan ang paghahanda ng mga national athletes sa naturang regional meet.

“That’s the first question I asked the PSC-POC Task Force: what is their timeline, the minimum number of days, months to prepare athletes to be ready by the end of November and December,” ani Fernandez.

Sa pagkopo sa overall title noong 2019 SEA Games ay humakot ang Team Philippines ng kabuuang 149 gold, 117 silver at 121 bronze medals kasunod ang Vietnam (98-85-105), Thailand (92-103-123), Indonesia (72-84-111) at Malaysia (56-57-71).

Hanggang ngayon ay hiwa-hiwalay pa rin ang training ng mga national athletes para sa 2021 Vietnam SEA Games dahil sa pandemya.

Umaasa rin si Fernandez na mababakunahan ang mga atleta sa buwan ng Hulyo o Agosto.