Ancajas tutulungan si Marcial

MANILA, Philippines — Matagumpay na naipagtanggol ni International Boxing Federation (IBF) super flyweight champion Jerwin Ancajas ang korona nito laban kay Mexican Jonathan Rodriguez noong Linggo sa Connecticut ngunit hindi pa tapos ang misyon ni Ancajas kaya’t wala pang balak bumalik sa Pilipinas ang kanyang grupo matapos ang kanyang title defense.

Mananatili ito sa Amerika upang tulungan ang kababayang si Eumir Felix Marcial sa pagha-handa nito para sa Tokyo Olympics na idaraos sa Hulyo sa Japan.

“Mag-stay pa muna kami dito dahil tutulu-ngan pa namin si Eumir sa preparations niya sa Olympics. Gusto naming makatulong sa target niya na makuha ‘yung gold sa Olympics,” ani Ancajas.

Malaki rin ang naitulong ni Marcial sa paghahanda ni Ancajas.

Sa katunayan, kasama si Marcial sa mga sparring partners ni Ancajas sa kanilang training camp.

Kaya naman nais ni Ancajas na ibalik ang pabor kay Marcial.

“Malaki ang naitulong niya sa sparring ko. Kaya wala kaming nasa isip ngayon kundi makuha ni Eumir ‘yung pangarap nating lahat na gold sa Olympics,” ani Ancajas.

Mananatili sa Los Angeles, California si Marcial hanggang sa unang linggo ng Mayo bago bumalik sa Pilipinas para makasama ang national team sa training camp.

Bahagi rin si Marcial ng delegasyon na sasabak sa Asian Championships sa huling bahagi ng Mayo sa India.