Clippers dinomina ang Rockets
LOS ANGELES — Humataw si Kawhi Leonard ng 31 points habang may 26 markers si Reggie Jackson para banderahan ang 126-109 pagdomina ng Clippers sa Houston Rockets.
Bumangon ang Clippers (36-18) mula sa 14-point deficit sa pagsisimula ng second period bago humataw ng 41-6 atake para iwanan ang Rockets (14-38) sa second half.
Umiskor si Leonard ng 11 points at nagsalpak si Jackson ng tatlong 3-pointers sa nasabing yugto para ibigay sa Los Angeles ang 67-46 bentahe sa halftime.
Pinamunuan ni Christian Wood ang Houston sa kanyang 23 points.
Sa Denver, ipinoste ni Nikola Jokic ang kanyang ika-54 career triple-double sa tinapos na 26 points, 14 assists at 13 rebounds para sa 121-119 paglusot ng Nuggets (34-18) sa San Antonio Spurs (24-26).
Sa New Orleans, humugot si Zion Williamson ng 14 sa kanyang 37 points sa fourth quarter para sa 101-94 pagdaig ng Pelicans (23-29) sa Philadelphia 76ers (35-17).
Sa Milwaukee, kumamada si Miles Bridges ng 26 points para pamunuan ang Charlotte Hornets (27-24) sa 127-119 paggupo sa Giannis Antetokounmpo-less Bucks (32-20).
Sa Boston, nagpasabog si Jayson Tatum ng career-high 53 points kasama ang 18 sa fourth quarter at overtime para sa 145-136 tagumpay ng Celtics (27-26) sa Minnesota Timberwolves (13-40).
- Latest
