Bucks inilusot ni Holiday
MEMPHIS, Tenn. — Isinalpak ni Jrue Holiday ang isang baseline jumper sa huling dalawang segundo para ilusot ang Milwaukee Bucks sa Grizzlies, 112-111 sa kanilang huling laro bago ang NBA All-Star break.
Humakot si Giannis Antetokounmpo ng 26 points, 11 rebounds at 8 assists para sa Bucks (22-14) at may 22 at tig-15 markers sina Khris Middleton, Holiday at Pat Connaughton, ayon sa pagkakasunod.
Pinamunuan ni Ja Morant ang Grizzlies (16-16) sa kanyang 35 points.
Sa New Orleans, naglista si Jimmy Butler ng 29 points at sinamantala ng Miami Heat (18-18) ang hindi paglalaro ni Zion Williamson para kunin ang 103-93 panalo sa Pelicans (15-21).
Sa Indianapolis, kumolekta si Nikola Jokic ng 20 points, 12 rebounds at 8 assists at may 24 markers si Michael Porter Jr. para sa 113-103 tagumpay ng Denver Nuggets (21-15) sa Indiana Pacers (16-19).
Sa Washington, kumamada si Bradley Beal ng 33 points para igiya ang Wizards (14-20) sa 119-117 pagtakas sa Los Angeles Clippers (24-14).
Sa Boston, humataw si Jayson Tatum ng 27 points at 12 rebounds para akayin ang Celtics (19-17) sa 132-125 pagsibak sa Toronto Raptors (17-19).
- Latest
