Palaban na Gilas ikakasa ng SBP sa FIBA olympic qualifiers

MANILA, Philippines — Pinakamalakas na koponan sa tulong ng PBA at ni Ivorian center Ange Kouame ang nais na buuin at ipadala ng Gilas Pilipinas para sa biglaang pagkakasali sa FIBA Olympic Qualifying Tournament ngayong taon.

Ito ang siniguro ng Samahang Basketbol ng Pilipinas na labis din ang pasasalamat sa world basketball governing body sa pambihirang tsansa sa qualifiers ng prestihiyosong Tokyo Olympics.

“Whenever we compete in international tournaments, we always aim to send the best team possible to make our Filipino fans proud,” ani SBP president Al Panlilio.

Kailangan ng SBP ng solidong Gilas team upang makasabay sa Group A ng OQT na gaganapin sa Belgrade kontra host Serbia at Dominican Republic. Nasa Group B naman ang Italy, Puerto Rico at Senegal.

Tanging isang koponan mula sa anim na bansa sa Belgrade OQT na nakatakda sa Hunyo 29 hanggang Hulyo 3 ang mabibigyan ng tiket patungo sa Tokyo Olympics sa Agosto.

Upang magawa ito, makikipagpulong ang SBP sa katuwang nitong PBA para masiguro ang malakas na koponang magpapatibay ng Olympic chances ng Gilas kasama si Kouame kung mapapabilis ang natura­lization process nito.

“We will be coordina­ting with the PBA to plot our plans moving forward and we’re hopeful that Ange Kouame’s natura­lization will be signed into law by then to give Gilas Pilipinas Men that added boost it needs to be more competitive,”ani Panlilio.

Malapit nang pumasa sa parehong kapulungan ng Kongreso ang naturalization bill ni Kouame, na import ng Ateneo sa UAAP, matapos ang pagpasa nito sa tatlong pagbasa sa House of  Represenatatives.