Sotto ‘di na lalaro sa ignite

MANILA, Philippines — Mananatiling nasa likod ni Kai Sotto ang Sama-hang Basketbol ng Pilipinas sa pangarap nitong makatuntong sa NBA sa kabila ng anunsyo ng G League na hindi na babalik ang Filipino teen wonder sa mother club na Ignite sa idinaraos na 2021 Season sa Disney Bubble sa Orlando, Florida.

“The Samahang Basketbol ng Pilipinas will always be 100% behind Kai Sotto as he pursues his NBA dream,” ani SBP President Al Panlilio. “Although we are saddened with the recent announcement that he will no longer be rejoining Ignite in the NBA G-League, we still wish Kai all the best and we will support him in any way we can.”

Kamakalawa ng gabi ayon sa pahayag ng G League ay nagdesisyon ang NBA developmental program at kampo ni Sotto na maghiwalay na ng landas.

“NBA G League Ignite and international prospect Kai Sotto of the Philippines today announced the mutual decision that Sotto will not re-join Ignite,” anang G League. “Kai will always be part of the extended Ignite family and we wish him continued success as he pursues his NBA dreams.”

Nauwi sa hindi inaasahang development ang 18-anyos na prodigy matapos iwan ang Ignite nang papasimula na ang G League bubble season nitong buwan upang maglaro sana sa Gilas Pilipinas sa ikatlo at huling window ng 2021 FIBA Asia Cup Qualifiers.

Dahil sa change venue mula sa Qatar pabalik sa Pilipinas, naurong ang torneo sa hindi pa alam na petsa, dahilan upang bumalik na sa US si Sotto para sana samahan ulit ang mother club na Ignite.

“Whatever may happen to their respective paths, they can always be sure that the SBP will be there to provide them a stage,” dagdag ng SBP.