Jamie Lim tuloy ang training kahit...

MANILA, Philippines — Hanggang ngayon ay wala pang katiyakan kung matutuloy ang 2021 Olympic Games sa Tokyo, Japan sa Hulyo dahil sa coronavirus disease (COVID-19) pandemic pero sinabi kahapon ni national karatedo team mainstay Jamie Lim na mas tinututukan niya ang kanilang preparasyon sa loob ng ‘bubble’ sa Inspire Sports Academy sa Calamba, Laguna.

“I’m just training po with the mindset na it will push through, so that I’ll be prepared for whatever happens,” wika ni Lim, ang 2019 Southeast Asian Games gold medalist, sa panayam ng PMSports.

Isa ang anak ni PBA legend Samboy Lim sa mga national karatekas na naghahangad na makasikwat ng tiket sa 2021 Tokyo Olympics na nakatakda sa Hulyo 23 hanggang Agosto 8.

Ang iba pa ay sina Fil-Japanese Junna Tsukii, ang 2019 SEA Games gold medal winner, Fil-American Joane Orbon, Alwyn Batican, Ivan Agustin at Sharief Afif. Sina Tsukii at Orbon ay kasalukuyang nagsasanay sa Japan at United States, ayon sa pagkakasunod.

Noong Martes ay sinimulan na ng national karatedo team ang kanilang pagpapakondisyon sa loob ng ‘Calambubble’.