PSL umorder na ng bakuna para sa buong liga

MANILA, Philippines — Kumuha ang Philippine Superliga (PSL) ng 1,000 vaccines para sa coronavirus disease (COVID-19) na ipamamahagi nito sa mga players, coaches at officials ng teams nito.

Mismong si PSL chairman Philip Juico na ang nagkumpirma na nakapag-order na ang liga sa pamamagitan ng Go Negosyo program ni Mr. Joey Concepcion.

Hihintayin na lamang ni Juico ang pagdating ng mga orders dahil kasalukuyan na itong pinoproseso.

“We made an order for 1,000 vaccines under the Go Negosyo program of Mr. Joey Concepcion and our request is being processed,” ani Juico sa programang Power and Play.

Mahaba ang proseso sa pagbili ng vaccine. By batch ang paglalabas ng vaccine dahil prayoridad na bigyan ang mga health workers at iba pang frontliners gayundin ang mga nakatatanda.

May mga kani-kanya ring orders ang iba’t ibang local government units. Inaasadang darating ang vaccine ng PSL sa kalagitnaan ng taon.

“There are batches of vaccines. We are in one of the batches. If things go as planned, we should have them by May or June,” ani Juico na may mga bagay ding nais linawin.

Sa kabila nito, wala pang linaw kung bibigyan na ng go signal ng Inter-Agency Task Force na makapagsimulang muli ang mga liga na sumailalim na sa vaccination.

“We don’t even know what the government’s policy will be in vaccine in sports. ‘Are you going to require players to be vaccinated?’ A lot will depend on the IATF,” ani Juico.