Patung-patong na kaso isasampa sa 3 PSC payroll scammers

MANILA, Philippines — Iba’t ibang kaso ang maaaring isampa ng Philippine Sports Commission (PSC) at National Bureau of Investigation (NBI) laban sa tatlong dating empleyado ng sports agency dahil sa nadiskubreng payroll scam noong nakaraang taon.

Sa inilabas na 23-page resolution na pirmado nina Assistant State Prosecutor Moises Acayan, Sr. Deputy State Prosecutor Richard Fadullon at Prosecutor General Benedicto Malcontento, inirekomendang sampahan ng PSC at ng NBI ng mga kaso sina Paul Ignacio, Michaelle Jones Velarde at Lymuel Seguilla, mula sa qualified theft, attempted qualified theft, cyber-related forgery hanggang sa computer-related fraud.

Inaresto si Ignacio, naka-assign sa PSC Personnel Department mula sa Information Systems Unit, sa isang entrapment operation ng NBI noong Hulyo 15 ng 2020.

Nabunyag ang payroll scam nina Ignacio, Velarde at Seguilla nang ireport ni Land Bank Vice President Marietta Cabusao ang anomalya sa malakihang transaksyon ni Ignacio sa kanilang Philippines Century Park Hotel Branch sa Malate na nasa likod ng Rizal Memorial Sports Complex.

Ang nasabing mga transaksyon ay nadiskubreng nasa LandBank payroll account ni Ignacio sa PSC.

Sa halos limang taon na operasyon ng grupo ni Ignacio ay nakakupit sila ng higit sa P14 milyon mula sa monthly allowances ng mga inactive na national athletes at coaches na isinasama nila sa PSC payroll.