National athletes pinababalik na ng PSC

MANILA, Philippines — Sinimulan na ng Phi-lippine Sports Commission (PSC) ang pagpapabalik sa mga national athletes sa kani-kanilang dormitoryo para sa inaasahang pagbibigay ng ‘green light’ ng Inter-Agency Task Force (IATF) sa balik-training.

May kaunting problema lamang ang PSC para sa nasabing proseso, ayon kay PSC Commissioner Ramon Fernandez.

“We are now starting to bring back athletes from the province. Med-yo delayed because of the permit and certificates that will be needed to secure before flight,” ani Fernandez. “Plus the fact we don’t have regular flights from certain provinces going to Manila,” dagdag pa ng dating four-time PBA Most Valuable Player.

Matapos pumutok ang coronavirus disease (COVID-19) noong Marso ay kaagad pinauwi ng PSC sa kani-kanilang mga probinsya ang mga national athletes.

Hanggang ngayon ay wala pang ‘go signal’ ang IATF para sa pagbabalik-ensayo ng mga atleta sa kanilang mga training venues sa Rizal Memorial Sports Complex sa Vito Cruz, Manila at Philsports Complex sa Pasig City.

Plano ng PSC na ipasok ang mga 2021 Olymic Games hopefuls sa ‘bubble’ training sa Inspire Sports Academy sa Calamba, Laguna.

“We are in coordination with Inspire that the athletes would be training there,” sabi ni Fernandez. “It should start very soon. They are working on bringing in the boxers back.”

Papasok rin sa ‘bubble’ training sa Inspire Sports Academy ang mga taek-wondo jins at karatekas na tumatarget ng tiket sa 2021 Olympics sa Tokyo, Japan.