24-golds na si De Los Santos

MANILA, Philippines — Walang makapigil World No. 1 kay Orencio James De Los Santos matapos angkinin ang isa na namang gintong medalya sa 5th SportData eTournament World Series.

Muling napahanga ni De Los Santos ang mga hurado nang magtala ito ng 24.9-23.7 panalo laban kay World No. 3 Domont Matias Moreno ng Switzerland sa gold-medal match.

Ito ang ikaanim na gintong medalya ni De Los Santos sa buwan lamang ng Nobyembre at ika-24 sa kabuuan ng kanyang kampanya sa online tournaments.

Mas lalo pang tumatag ang kapit ni De Los Santos sa unang puwesto sa world rankings dahil mas malaki ang nakuha nitong puntos sa 5th SportData eTournament World Series.

Ang isang SportData World Series event ay nagbibigay ng mas malaking puntos (1,450 points) — halos apat na beses na mas malaki kumpara sa isang regular tournament na may 435 o 405 lamang.

“I’m widening the gap even further in the eKata world rankings since this e-tournament is nearly four times the amount of ranking points. Forward is the only way to go,” ani De Los Santos sa kaniyang post sa social media.

Kabilang sa mga tinalo ni De Los Santos sina Andrei Gabriel Nedelcu ng Romania sa Round-of-16 (24.6-23.7), Lukas Grimm ng Germany sa quarterfinals (24.4-23.2) at World No. 4 Silvio Cerone-Biagioni ng South Africa sa semifinals (24.4-24.1).