Players ng Manila Chooks TM squad nagkulasan para sumali sa PBA Draft

MANILA, Philippines — Nabuwag ang Manila Chooks TM matapos magdesisyon ang lahat ng apat na miyembro nito na lumahok na lamang sa PBA Annual Rookie Draft.

Nagdesisyon sina Joshua Munzon, Alvin Pasaol, Troy Rike at Santi Santillan na hindi na i-renew ang kanilang kontrata sa Chooks-to-Go Pilipinas 3x3 na mapapaso na sa Disyembre.

Sariwa pa ang Manila Chooks TM sa kampanya nito sa FIBA 3x3 World Tour-Doha Masters sa Qatar kamakailan.

Ngunit bigo itong makapasok sa quarterfinals matapos lumasap ng dalawang sunod na kabiguan sa group stage — laban sa Liman ng Serbia (15-22) at Lusail ng Qatar (14-19).

Hindi naman hinadlangan ng pamunuan ng Chooks-to-Go Pilipinas 3x3 ang desisyon ng apat dahil suportado ng grupo ang pangarap nilang makapasok sa PBA.

“We at Chooks-to-Go won’t hinder you from achieving your dreams. Good luck on your next journey! All of you will always be a Manok ng Bayan!” ayon sa statement ng liga.

Nagpasalamat din ang Chooks-to-Go Pilipinas 3x3 sa dalawang taong pinagsamahan nito na nagresulta sa matagum-pay na pagpapalakas ng 3x3 sa bansa.

“Thank you Joshua Munzon, Alvin Pasaol, Troy Rike, and Leonard “Santi” Santillan for making our country proud over the last two years,” nakasaad pa sa statement.