Petecio umiwas sa luto ng Nanay para mag-training

MANILA, Philippines — Bagama’t nasa kanilang probinsiya na sa Santa Cruz, Davao del Sur ay mas pinili ni Olympic Games hopeful Nesthy Petecio na maghanap ng boxing gym sa ibang lugar para sa kanyang sariling pag-eensayo.

Sinabi ng 28-anyos na featherweght lady boxer, nakatira rin ngayon sa isang apartment sa Digos City, na ayaw lamang niyang tumaba nang husto habang nasa kanilang bahay.

“Nag-decide ako na maghanap ng gym (sa Digos City) kung saan ako makakapag-training kasi mahirap kapag naka-stay ako sa bahay,” ani Petecio sa ‘People Sports Conversations’ program ng Philippine Sports Commission (PSC) kamakailan. “Ang hirap umiwas sa pagkain lalo na kung luto ni Mama (Prescilla).”

Umaasa ang gold medalist ng 2019 AIBA Wo-men’s World Boxing Championships na makakasuntok din siya ng tiket para sa 2021 Olympics na gagawin sa Tokyo, Japan kagaya nina national boxers Eumir Felix Marcial at Irish Magno.

Ang middleweight na si Marcial ay kasalukuyang nagsasanay sa United States, habang nag-eensayo sa isang gym sa Iloilo City ang flyweight na si Magno.

May Olympic berth din sina pole vaulter Ernest John Obiena at gymnast Carlos Edriel Yulo na nasa Italy at Japan, ayon sa pagkakasunod.

“Lagi kaming may online training,” sabi ni Petecio. “Si coach Nolito (Velasco) laging nagse-send ng training program na gagawin ko every morning. Pagdating sa hapon nag-o-online training kami.”

Umaasa si Petecio na maitatakda ang Olympic qualifying tournament sa Mayo ng susunod na taon sa Paris.

Bukod kay Petecio, naghahangad rin ng Olympic slot sina 2016 Rio de Janeiro silver medalist Hidilyn Diaz (weightlifting), 2018 Asian Games gold medal winner Margielyn Didal (skateboarding), Fil-Ja-panese Kiyomi Watanabe (judo) at Fil-Ams Kristina Knott at Eric Shaun Cray (athletics).