Labanang Tolentino-Aranas mainit sa POC elections

MANILA, Philippines — Na-finalize na ang mga kandidatong maglalaban-laban para sa mga mahahalagang posisyon sa Philippine Olympic Committee (POC) sa eleksyong gagawin sa Nobyembre 27.

Inilabas ni POC election committee chairman Teodoro Kalaw IV ang listahan matapos ang huling araw ng pagsusumite ng certificate of candidacy noong Sabado.

Haharapin ni incumbent president at Cavite Rep. Abraham ‘Bambol’ Tolentino ng cycling si Atty. Jesus Clint Aranas ng archery para sa presidential post ng POC.

Hangad ng 56-anyos na si Tolentino, pangulo ng Integrated Cycling Federation of the Philippines (PhilCycling), ang kanyang full term matapos talunin si Philip Ella Juico ng athletics sa snap election noong Hulyo ng 2019 makaraan ang biglaang pagbibitiw ni boxing head Ricky Vargas.

Umaasa naman si Aranas, presidente ng World Archery Philippines (WAP), na mananalo siya kay Tolentino para sa bagong liderato ng POC.

Ang mga nasa tiket ni Tolentino na lalaban para sa iba’t ibang puwesto ay sina Tom Carrasco (chairman) ng triathlon, Al Panlilio (first VP) ng basketball, Ormoc City Mayor Ri­chard Gomez (2nd VP) ng fencing at modern pentathlon, Cynthia Carrion (treasurer) ng gymnastics, Chito Loyzaga (auditor) ng baseball at sina Raul Canlas ng surfing, Dave Carter ng judo, Prospero ‘Butch’ Pichay ng chess at Pearl Managuelod (muay) para sa POC Board.

Ang grupo ni Aranas ay binubuo nina Steve Hontiveros (chairman) ng handball, Juico (first vice president) ng athletics, Ada Milby (second vice president) ng rugby, Monico Puentevella (auditor) ng weightlifting, Julian Camacho (treasurer) ng wushu at sina Robert Bachmann ng squash, Charlie Ho ng netball, Robert Mananquil ng billiards at Jeff Tamayo ng soft tennis (POC Board).