‘Di pa tapos si De los Santos
MANILA, Philippines — Ilang virtual kata tournaments pa ang inaasahang lalahukan ni Filipino karateka James De los Santos bago matapos ang taon para mapanatili ang kanyang paghawak sa World No. 1 ranking.
“Time to raise the bar even higher,” ani De los Santos na inangkin kamakalawa ang kanyang pang-17 gold medal matapos maghari sa Katana Inter-Continental Karate League e-Tournament.
Nakakolekta ang 30-anyos na si De los Santos ng 26.1 points para talunin si Costa Rican Juan Achio (25.1 points) at sikwatin ang gold.
Ang nasabing puntos ng two-time Southeast Asian Games bronze medalist ang pinakamataas na naiskor sa mga online competitions na sinimulan noong Marso nang pumutok ang coronavirus disease (COVID-19) pandemic.
“This is special for me because I did not only took my 17th gold, I won it as the first eKata player to ever score 26,” wika ng Pinoy karateka.
Bago nakatapat si Achio sa final round ay sinapawan muna ni De los Santos sina Abdellatif Choukri ng Morocco, 24.9-23.7 at Nejc Sternisa ng Slovenia, 25.1-24.1.
Nanggaling si De los Santos sa paghahari sa Golden League noong nakaraang linggo at pa-tuloy siyang nasa top ranking matapos ungusan si dating World No. 1 Eduardo Garcia ng Portugal.
- Latest
