FIBA-Asia Cup bubble pinag-aaralan na ng SBP

MANILA, Philippines — Naghahanda ang Samahang Basketbol ng Pilipinas (SBP) sa inihayag na paggamit ng ‘bubble’ ng international basketball federation (FIBA) para sa pagpapatuloy ng naudlot na dalawang windows ng 2021 FIBA Asia Cup qualifiers.

Sinabi ni Gilas Pilipinas program director Tab Baldwin na pinag-uusapan na ng mga SBP officials ang mga plano para sa nasabing konsepto ng FIBA.

“We are as ready with as many scenarios that we have discussed through that you can possibly imagine,” pagtiyak ng dating head coach ng Gilas Pilipinas. “But which one of those scenarios will ultimately be the one that we have to confront? We just can’t make decisions right now because we don’t know exactly what the landscape is,” dagdag nito.

Noong Setyembre 18 ay inihayag ng FIBA na gagawin ang nasabing dalawang qualifiers, itinakda sa Nobyembre at Pebrero, sa loob ng ‘bubbles’ imbes na sa naunang ipinatupad na ‘home and away games’.

May 1-0 record ang Gilas Pilipinas sa Group A kung saan kasama nila ang South Korea, Thailand at Indonesia.

Matapos talunin ang Indonesia noong Pebrero ay nakatakdang labanan ng Nationals ang South Korea sa Nobyembre 27 at ang Thailand sa Nobyembre 30.

Muling haharapin ng Gilas Pilipinas ang Indonesia sa Pebrero 18, 2021 at isasara ang third window kontra sa South Korea sa Pebrero 21.

Bukod sa kawalan pa rin ng head coach ay hindi pa nagdedesisyon ang SBP kung sinu-sino ang bubuo sa koponan na isasabak sa nasabing mga qualifiers.

Sa 100-70 pagmasaker sa Indonesia ay ibinandera ng Gilas Pilipinas sina PBA players Kiefer Ravena, Abu Tratter, Poy Erram, Justin Chua, Roger Pogoy, CJ Perez at Troy Rosario kasama ang ilang cadets.

“We don’t have enough cadets to fill out a roster,” ani Baldwin. “We can’t play with five players. Six, if we include JD (Tungcab), seven if we are allowed to get Thirdy (Ravena). That right now is our Gilas pool.”