Maagang silatan sa NBA playoffs
Nakikita ng marami na maagang magkakasilatan sa pagsisimula ng playoffs ng NBA bubble sa Disney World Resort sa Orlando, Florida.
“May masisilat sa first round pa lang. At isa ang Lakers sa delikadong matapilok,” ani Kandong Pabaya na bida sa huntahan na may social distancing ng tropang kubo sa Maysan, Valenzuela sa araw ng kanyang 55th birthday kahapon.
May matinding pag-ayon lalo na mula sa mga mas lalong humanga kay Damian Lillard dahil sa kanyang MVP showing sa seeding games.
“May momentum, mataas ang kumpiyansa at gigil ang kikig,” ani Pareng Odie Chua sa mga bagay na dala nila Lillard at katropa sa pagharap sa Western Conference top seed na LA Lakers.
“Sa Eastern Conference, mukhang Boston naman ang delikadong masilat,” ani Kagawad Dennis Alemania, na kampi sa No. 6 na Philadelphia kontra third seed na Boston.
Nagmamasid lamang si Eng. Ariel Francisco na bilang golfer ay mas interesadong langhapin ang panalo ni Yuka Saso sa Japan golf tour. Samantalang ang pagkainip sa sa-bong ang nararamdaman ni Eng. Ernie Malit.
Magsisimula ang playoffs araw ng Lunes sa US (ngayon sa Pilipinas) kung saan maghaharap ang Utah Jazz-Denver Nuggets, Brooklyn Nets-Toronto Raptors, Philadelphia Sixers-Boston Celtics at Dallas Mavericks-LA Clippers.
Sa susunod na araw ang simula ng Orlando Magic-Milwaukee Bucks, Miami Heat-Indiana Pacers, OKC Thunder-Houston Rockets at Blazers-Lakers.
Tutok ang sports world sa kaganapang ito lalo na ang Filipino sports fans na walang ibang napapanood na sports events sa kasalukuyan.
- Latest
