Tuluy-tuloy ang pagsuporta ng PSC sa Olympic athletes
MANILA, Philippines — Bagama’t mabigat na hinaharap ng bansa ang coronavirus disease (COVID-19) pandemic ay hindi isusuko ng Philippine Sports Commission (PSC) ang pagsuporta sa mga national athletes na lalaban sa 2021 Olympic Games.
Sa katunayan ay nasa kalahati pa lamang ng 2020 ay nakapaglabas na ang PSC ng higit sa P351 milyon para sa mga Olympic bets, ayon kay chairman William ‘Butch’ Ramirez. “It has been quite a challenge but we hope to keep our commitment to fund and support our athletes who have shown strong determination and chances in winning our first Olympic gold,” aniya.
Nakapagbulsa na ng tiket para sa 2021 Olympics na gagawin sa Tokyo, Japan sina gymnast Carlos Edriel Yulo, pole vaulter Ernest John Obiena at boxers Eumir Felix Marcial at Irish Magno.
Nabawasan ng pondo ng sports agency nang maisama sa Bayanihan Act I ang kanilang P596 milyon mula sa National Sports Development Fund at P773 milyon galing sa General Appropriations Act (GAA).
Nagbigay ang PSC ng higit sa P20.2 milyon sa Philippine Athletics Track and Field Association (PATAFA) ni Obiena; tumanggap na ng P13 milyon ang Association of Boxing Alliances in the Philippines (ABAP) nina Marcial at Magno; habang ang Gymnastics Association of the Philippines (GAP) ni Yulo ay nabigyan na ng P7.8 milyon.
“We are doing what we can for our national athletes. We want them to stay focused on their goals and to stay positive while aspiring for Olympic glory,” ani Ramirez. “We want to remind them that PSC is always here to help them achieve success in any way that is possible.”
Tumatarget din ng Olympic berth sina 2016 Rio Olympics weightlifting silver medalist Hidilyn Diaz, 2019 world champion female boxer Nesthy Petecio, skateboarder Margielyn Didal, taekwondo jin Pauline Lopez at karatekas Jamie Lim at Junna Tsukii.
- Latest
