Casimero kailangang maghanap ng ibang makakalaban
MANILA, Philippines — Kailangan na ni Filipino world bantamweight champion John Riel Casimero na maghanap ng ibang makakalaban.
Ito ay dahil itinapat na ni Bob Arum ng Top Rank Promotions si Japanese star Naoya Inoue kay No. 1 contender Jason Moloney ng Australia sa isang boxing championship fight sa Setyembre o Oktubre.
Dahil dito ay naiwan sa ere si Casimero, ang kasalukuyang World Boxing Organization (WBO) bantamweight king at nagdadala ng 29-4-0 win-loss-draw ring record kasama ang 20 knockouts.
Si Casimero ay nasa bakuran ng MP Promotions ni eight-division champion Manny Pacquiao.
Nauna nang sinabi ni Arum na maitatakda ang unification fight nina Casimero at Inoue (19-0-0, 16 KOs) kung papayag ang 30-anyos na tubong Ormoc City na bawasan ang kanyang prize money.
Dalawang beses iniatras ang nasabing bakbakan nina Casimero at Inoue, ang World Boxing Association (WBA) at International Boxing Federation (IBF) bantamweight titlist, sa Mandalay Bay Events Center sa Las Vegas, Nevada dahil sa coronavirus disease (COVID-19) pandemic.
Sa pagpaplantsa ni Arum sa banggaan nina Inoue at Moloney ay inaasahang titingin ng ibang makakalaban si Casimero, dating kampeon ng IBF light flyweight at flyweight divisions.
Ang dalawa dito ay sina American Rau’shee Warren (17-3-0, 4 KOs) na dating WBA at International Boxing Organization (IBO) bantamweight title-holder at Mexican Pedro Guevara (36-3-1, 21 KOs).
- Latest