RMSC, PhilSports lockdown
MANILA, Philippines — Isinara ng Philippine Sports Commission (PSC) ang Rizal Memorial Sports Complex sa Vito Cruz, Manila at ang PhilSports Complex sa Pasig City matapos magpositibo sa coronavirus disease (COVID-19) ang lima nilang empleyado.
Wala pang katiyakan kung kailan muling bubuksan ang dalawang sports complex, ayon kay PSC chairman William “Butch” Ramirez.
“May we humbly advice all concerned that both complexes shall be on complete lockdown from August 12 until further notice,” wika ni Ramirez sa kanilang official Facebook page kahapon. “This is part of the agency’s health security protocol, after a staff tested COVID-19 positive in the recent round of RT-PCR testing.”
Ang nasabing limang empleyado ng PSC ay pawang mga asymptomatic at kaagad pinauwi sa kanilang mga bahay para mag-quarantine.
May mga report din na isang construction worker na kasama sa renovation ng swimming facility sa RMSC ang nahawahan ng coronavirus disease.
Regular ang ginagawang COVID-19 testing ng komisyon sa kanilang mga empleyado bago nagkaroon ng limang nagpositibo test .
Dahil sa lockdown sa dalawang sports venues ay magtatrabaho ang mga empleyado ng komisyon sa ‘work from home’ scheme habang nagsasagawa ng contact tracing.
“Only frontliners and security are allowed to enter,” sabi ni Acting Executive Director Atty. Guillermo Iroy. “Even our skeletal employees assigned will have to work from home since we’re still doing tracing.”
Si Ramirez ay nananatili sa dormitoryo sa PhilSports Complex kasama ang asawang si Mercy at sina PSC Commissioners Ramon Fernandez at Charles Raymond Maxey.
- Latest
