Ancajas may ‘bubble’ sa training

MANILA, Philippines — Maski ang isang world boxing champion ay kailangan ding sumunod sa ipinag-uutos ng Inter-Agency Task Force on Emerging Infectious Disease (IATF) para makaiwas sa coronavirus disease (COVID-19).

Sa Survival Camp sa Magallanes, Cavite nag-eensayo si International Boxing Federation (IBF) super flyweight title-holder Jerwin Ancajas para sa kanyang nakalinyang na laban kay Mexican challenger Jonathan Javier Rodriguez.

Tiniyak ni Joven Jimenez, ang trainer/manager ni Ancajas, na sinusunod nila ang inilatag na health at safety protocols ng IATF.

“Walang exemption. Parang ang sinasabi nila coach Joven, eh walang lumalabas doon sa camp nila,” wika ni Games and Amusements Board (GAB) chairman Abraham ‘Baham’ Mitra sa training camp ni Ancajas. “Parang may mini bubble sila doon. Hindi sila nakikihalo sa iba.”

“Even if they are world champions, siguro naman alam nila ‘yung responsibilities nila. We want everybody sana to self-regulate,” dagdag ni Mitra.

Inilagay ang Cavite sa Modified Enhanced Community Quarantine (MECQ) mula August 4 hanggang 18 kasama sa Metro Manila, Laguna, Rizal at Bulacan.

Bagama’t bawal ang sparring ay tuluy-tuloy ang pagpapakondisyon ni Ancajas (32-1-2, 22 KOs) para sa kanyang title defense kay Rodriguez (21-1-0, 15 KOs) na posibleng mangyari sa Setyembre sa United States.

Naniniwala naman ang GAB na chief na kukuha sa kanila ng professional boxing license si national boxing standout Eumir Felix Marcial bago ito su-mabak sa isang four-round bout sa US sa Oktubre.

“Naghihintay lang po kami. Very welcome po (siya),” wika ni Mitra sa middleweight fighter na pinapirma ng MP Promotions ni Manny Pacquiao sa isang six-year contract. “Meron na kaming online application by appointment.”

Pinayagan ni Pacquiao ang 24-anyos na si Marcial na kumampanya sa 2021 Olympic Games sa Tokyo, Japan kasabay ng paghahanda ng tubong Zamboanga City sa kanyang pro debut fight.