Atat na si Obiena sa sasalihang virtual pole vault competition

MANILA, Philippines — Sabik nang sumalang sa kompetisyon si EJ Obiena kasama ang kapwa Olympians sa nakalinyang unang pole vault event buhat nang pumutok ang pandemya.

“I am honored to be part of virtual pole vault competition with fellow Olympians. I would go for the finest pole vaulter title,” ani Obiena sa kanyang Facebook post kamakailan.

Makakalaban ng Pinoy pole vault star sa online competition sina Matt Ludwig ng USA at Pawel Wojciechowski ng Poland na parehong qualified athletes din sa Tokyo Olympics na naurong sa susunod na taon. 

Hindi normal na kompetisyon ang sasalihan ng tatlong Olympians dahil gagawin nila ang jump mula sa kani-kanilang training locations at makikita ang kani-kanilang jumps sa live streaving sa Agosto 17.

Magpapasiklab ang 24-anyos na SEA Games gold medalist mula sa kanyang training camp sa Italy para sa torneong  inorganisa ng Fine Guard Sports. Si Obiena ang unang Pinoy na nakasiguro ng tiket sa Summer Games.