Mabangis si Giannis

LAKE BUENA VISTA, Florida — Kumonekta si Giannis Antetokounmpo ng isang tiebreaking three-point play sa huling 1:28 minuto ng fourth period para tulungan ang Milwaukee Bucks sa 119-112 panalo laban sa Boston Celtics sa NBA season restart nitong Biyernes.

Nagsalansan si Antetokounmpo ng 36 points, 15 rebounds at 7 assists para sa Bucks, may NBA best record na 54-12 at nakalapit sa top seeding sa Eastern Conference para sa ikalawang sunod na taon.

Nakabalik ang Boston mula sa pagkakaiwan para itabla ang laro sa 107-107 kasunod ang 3-point play ni Antetokounmpo kay Marcus Smart para iangat ang Milwaukee sa 110-107 sa huling 1:28 minuto ng laro.

Pagkatapos sumablay ang 3-point attempt ni Jaylen Brown para sa Cel-tics, tumipa si Khris Middleton ng tres para sa 113-107 abante ng Bucks sa nalalabing 63 segundo.

Nagpasabog naman si James Har-den ng 49 points habang may 31 markers si Russell Westbrook para pamunuan ang Houston Rockets sa 153-149 overtime win kontra sa Dallas Mavericks.

Nakabangon ang Rockets mula sa 14-point deficit para makalapit sa Mave-ricks sa 131-138 agwat sa huling 45.2 segundo ng fourth period hanggang makatabla sa 139-139 mula sa tip-in ni Robert Covington.

Kumolekta si Kristaps Porzingis ng 39 points at 16 rebounds para pamunuan ang Dallas habang kumamada si Luka Doncic ng triple-double na 28 points, 13 rebounds at 10 assists.