PSC paiimbestigahan sa NBI ang payroll padding

MANILA, Philippines — Humingi ng tulong ang Philippine Sports Commission sa National Bureau of Investigation para imbestigahan ang diumano’y  “athletes-padding” o ang payroll scam na ginagawa diumano ng isang emple-yado ng ahensiya.

“We have sought the help of the NBI on the matter so we cannot comment further,” sabi ni Philippine Sports Commission officer-in-charge Ramon Fernandez sa isang statement kahapon.

Sa sulat noong July 10, 2020 sa NBI officer-in-charge Eric Distor, itinuturo ni PSC executive director Merlita Ibay si Paul Michael Padua Ignacio mula sa personnel department ng ahensiya na siyang gumagawa ng modus.

Inabisuhan si Ibay sa posibleng anomalya ni Marietta Cabusao, assistant vice president ng Land Bank of the Philippines Century Park Hotel branch sa “unusual payroll transactions” sa account ni Ignacio.

Ang modus umano ni Ignacio, ang gumagawa ng payroll register ng mga national athletes at coaches, ay paglilista ng mga athletes at coaches na hindi na dapat kasama sa payroll at ipinapasok sa kanyang sariling bank  account ang ‘pasahod’ na sinasabing limang taon nang nangyayari kaya malaking pera ang nawawala sa ahensiya.

“Suffice it to say, that there were red-flags, which alerted us and so we acted accordingly. We hope that we can get to the truth and bring the accountable to justice swiftly,” sabi ni Fernandez. “The PSC will never waver in its duty to protect the interest of its stakeholders and the Filipino people.”

Magkakaroon ng online press conference si Fernandez at kinatawan ng NBI representative ngayon upang talakayin ang naturang isyu.