Si Fernandez ang bahala kay Didal
MANILA, Philippines — Tiniyak ng Philippine Sports Commission (PSC) na maipagpapatuloy ni top skateboarder Margielyn Didal ang kanyang pag-eensayo para sa posibleng pagsikwat ng tiket sa 2021 Tokyo Olympic Games.
Mismong si PSC-OIC Ramon Fernandez ang gagawa nito para sa Cebuana star.
“I’m trying to arrange for her to continue her practice,” wika ni Fernandez sa 2018 Asian Games gold medalist. “She’s already given me her sche-dule. She will be practicing MWF (Monday, Wednesday-Friday).”
Nauna nang nakakuha ng tiket para sa Tokyo Oympics sina gymnast Carlos Edriel Yulo, pole vaulter Ernest John Obiena at boxers Eumir Felix Marcial at Irish Magno.
Bukod sa 21-anyos na si Didal ay tumatarget din ng Olympic berth sina 2016 Rio de Janeiro Olympics silver medal winner Hidilyn Diaz ng weightliting at Nesthy Petecio ng boxing.
Sa Hoops Dome sa Lapu-Lapu City ang napili ng PSC na maging practice venue ni Didal dahil nasa Enhanced Community Quarantine (ECQ) ang Cebu City bunga ng coronavirus disease (COVID-19) pandemic.
Gumawa rin ang tatay ni Didal ng skate ramp sa kanilang bahay sa Cebu kung saan nakakapag-ensayo si Didal na kanyang ipinakita sa social media.
“Sunday sesh with #nm379, still learning with this new playground made by paps,” sabi ni Didal sa 30-seconds video na kanyang pinost sa Instagram.
Kasalukuyang nasa 14th place sa buong mundo at ika-third sa Asya si Didal at may pito pang kumpetisyon na ang dapat niyang salangan.
- Latest
