Marcial sabik nang mag-training

MANILA, Philippines — Sa pagsisimula ng kanyang makulay na amateur boxing career ay hindi biro ang dinanas na paghihirap ni welterweight Eumir Felix Marcial.

At umaasa ang tubong Zamboanga City na ang lahat ng kanyang sakripisyo ay magbubu-nga ng kauna-unahang gold medal ng Pilipinas sa Olympic Games.

Isa si Marcial sa kakampanya sa 2021 Olympics na idaraos sa Tokyo, Japan bukod kina lady boxer Irish Magno, pole vaulter Ernest John Obiena at gymnast Carlos Edriel Yulo.

“Ang dami kong pinagdaanan bago ako nag-qualify (sa Tokyo Olympics), ang dami kong sakripisyo,” litanya ni Marcial sa panayam ng Sports Lockdown. “Noong panahon namin sobrang hirap ng buhay namin. Everytime na ga-ling ako ng school at sasalubungin ako ng tatay ko sasabit lang kami sa jeep kasi wala kaming pambayad. Pagbaba namin ng highway maglalakad kami ng three kilometers papasok ng Universidad de Zamboanga City gym para mag-training.”

Inihayag ni Philippine Sports Commission (PSC) Officer-in-Charge (OIC) Ramon Fernandez ang pagpayag ng Inter-Agency Task Force (IATF) na magbalik-ensayo sina Marcial at Magno sa Rizal Memorial Sports Complex sa Manila.

“Siguro mga three months fit na fit na ako nun.Ready to fight na tayo,” wika ni Marcial. “Siguro mga dalawang buwan good na iyon para sa akin. Mahaba na ‘yung tatlong buwan.”