Lady Bulldogs nilapa ang solong liderato
MANILA, Philippines — Solong liderato ang kinuha ng National University Lady Bulldogs, habang nakabawi ang University of Santo Tomas Golden Tigresses sa UAAP season 82 women’s volleyball tournament kahapon sa Mall of Asia Arena sa Pasay City.
Pinahiya ng Lady Bulldogs ang Adamson Lady Falcons, 26-24, 25-14, 25-21, at winalis ng Golden Tigresses ang Far Eastern University Lady Tamaraws, 25-20, 25-16, 25-18.
Umariba para sa Bustillos-based squad si senior wing hitter Audrey Paran na may 15 points mula sa 10 attacks, 3 aces at 2 blocks.
May dagdag pang 13 markers si Congolese rookie Margot Mutshima para sa NU.
“Masaya kami dahil pangalawang panalo namin for this season. Sobra kaming na-inspire kasi unlike last season hindi ba nakuha namin ‘yung first win namin matagal pa,” sabi ni coach Norman Miguel.
“Malaking factor ito para sa players namin. Malaking morale boost para sa kanila to work harder towards the succeeding games namin.”
Sa panig naman ng UST, hindi nila hinayaan na makaapekto sa laro ang huling pagkatalo laban sa NU at ibinaon ang FEU lalo na sa third set kung saan ipinoste nila ang 15-5 bentahe patungo sa 23-11 kalamangan.
Nagawa pang manakot ng Lady Tamaraws nang pakawalan ang 6-0 atake para ibaba sa 17-23 ang kanilang hinahabol.
Ngunit hindi nagpatinag ang UST at humataw sina Ysa Jimenez at Babylove Barbon para tuldukan na ang laro.
Kinapitan ng 2019 season runner-up ang magkapatid na Eya at EJ Laure na pumalo ng 16 at 12 points, ayon sa pagkakasunod.
- Latest