Oconer nakatutok sa korona ng 2020 LBC Ronda
BAGUIO CITY, Philippines — Minani ng Standard Insurance-Navy ang sinasabing ‘killer stage’ sa LBC Ronda Pilipinas 10th anniversary race.
Anim na Navy riders ang kasama sa top 10 finishers sa Stage Eight na nagsimula sa Palayan City at nagtapos sa Burnham Park dito kahapon.
Nagwagi sa nasabing stage si Daniel Ven Cariño ng Go for Gold kasunod si Marvin Tapic ng Bicycology Shop-Army, habang nasa third at fourth place sina Go for Gold riders, Jonel Carcueva at Ismael Grospe, Jr., ayon sa pagkakasunod.
Tumawid ng meta bilang No. 10 ang may tangan ng Red Jersey na si George Oconer.
Ang iba pang Navy cyclists na swak sa unang 10 siklista ay sina Junrey Navarra (5th), 2018 champion Ronald Oranza (6th), Ronald Lomotos (7th), John Mark Camingao (8th) at El Joshua Cariño (9th).
Lumakas ang tsansa ng 28-anyos na si Oconer sa asam na titulo sa event na inorganisa ng LBC at pakikipagtulungan sa Manny V. Pangilinan Sports Foundation.
“Pangarap ko talagang manalo sa Ronda kaya kung sakali na makuha ko malaking pasasalamat ko sa mga kakampi ko at sa buong team na sumosuporta sa amin,” wika ng anak ni dating Olympian Norberto Oconer.
Nakapagtala ng aggregate clocking na 27 oras, 34 minuto at 35 segundo si Oconer sapat para hawakan ang top spot ng overall individual classification.
Hindi nagalaw ang iba pang Navy riders sa individual classification.
Nasa No. 2 si Oranza, tersero si Lomotos, pang-apat si Camingao habang fifth at sixth sina Navarra at Cariño, ayon sa pagkakasunod.
Samantala, tiyak na ang overall team classification title sa Navy sa kanilang 110:18,25 oras.
- Latest
