Navy bumandera sa stage five
ANTIPOLO CITY, Philippines – Dalawang sunod na stages ang dinomina ng Standard Insurance-Navy sa umiinit na LBC Ronda Pilipinas 2020.
Anim na Navy riders ang unang dumating sa finish line kaya nakopo ulit nila ang 1,2,3 finish matapos ang 128.5-kilometer Stage Five na nagsimula sa Lucena City at nagtapos dito kahapon.
Unang tumawid sa meta si John Mark Camingao, pangalawa si 2018 king Ronald Oranza, habang tersero si Junrey Navarra.
Nasa pang-apat hanggang pang-anim na puwesto sina El Joshua Cariño, Stage Four winnier Ronald Lomotos at ang bagong magsusuot ng Red Jersey na si George Oconer.
Inirehistro nila ang pare-parehong bilis na tatlong oras, 12 minuto at 50 segundo sa event na suportado ng LBC at inisponsoran ng Manny V. Pangilinan Sports Foundation kasama ang Versa, 8A Performance, Print2Go, Petron, Green Planet, Bike Xtreme, Standard Insurance, Spyder, CCN, Lightwater, Prolite, Guerciotti, Black Mamba, Boy Kanin, Vitamin Boost, NLEX-SCTEX, Maynilad, 3Q Sports Event Management Inc., LBC Foundation at PhilCycling.
Nasa ika-24 namang dumating si Mark Julius Bordeos ng Bicycology Shop-Army at mahigit limang minutong diperensa sa anim na Navy na tumawid sa meta kaya nahubaran siya ng Red Jersey at nalilipat ito kay Oconer paglarga ng 111.9-km. Tarlac-Tarlac Stage Six bukas.
Nakalikom si Oconer ng 17 oras, 54 minuto at 13 segundo sapat upang mahawakan ang overall individual classification.
Sa Stage Four ay tatlong Navy ang umakyat sa podium matapos manalo si Lomotos, pumangalawa si Navarra at pumangatlo si Cariño.
Samantala, malaking bagay ang naitulong ni Oranza sa tagumpay ng Navy sa nasabing stage,
Naiba ang plano ng Navy kaya pinamunuan ni Oranza ang atake para magtuluy-tuloy sila sa finish line.
“Pangalawang option namin ito kasi naiba ang plano namin, dapat kami ang susunod pero nagkabaliktad, kaya sabi ko sa mga teammates ko magtrabaho kami para makuha ang stage na ito,” sabi ni Oranza na ganadong pumadyak dahil sa kanyang tatlong buwang buntis na asawa.
- Latest
