Lomotos umarangkada sa Stage Four
LUCENA CITY – Hindi inaksaya ni Ronald Lomotos ng Standard Insurance-Navy ang pagkakataong ibangon ang kanyang pangalan sa local cycling.
Kaya naman ipinakita ng 25-anyos na si Lomotos ang kanyang tikas upang sikwatin ang panalo sa Stage Four ng LBC Ronda Pilipinas na nagsimula sa Daet, Camarines Sur at nagtapos dito kahapon.
Inamin ni Lomotos na nadapa at sumadsad ang kanyang pangalan ng ma-disqualified siya sa karera noong 2018 edition kaya bago umarangkada ang 10-stage event ay nasa isip na niyang bumawi ngayong taon.
“Kailangang may maputanayan ako kaya pinursige ko talaga. Gusto kong bumawi kasi ‘yung pangalan ko sa cycling wala na eh. Down na talaga,” kuwento ni Lomotos.
Nakamit ni Lomotos ang pangalawa niyang stage win sapul nang sumali sa LBC Ronda Pilipinas noong 2014.
Nagtala ang tubong San Felipe, Zambales na si Lomotos ng tiyempong apat na oras, 56 minuto at 28 segundo sa naturang 205.5-kilometer race.
Nakasabay niyang dumating sa meta ang kanyang mga teammates na sina Junrey Navarra at El Joshua Cariño na tumapos bilang No. 2 at No. 3, ayon sa pagkakasunod..
Samantala, nahubaran ng Red Jersey si Stage Three winner Jerry Aquino, Jr. ng Scratch It nang hindi nakapasok sa Top 20 finishers.
Muling naagaw ni Mark Julius Bordeos ng Bicycology Shop-Army ang overall individual classification.
Nakalikom ang 24-anyos na si Bordeos ng 14 oras, 41 minuto at 17 segundo matapos ang apat na stages.
Umangat sa No. 2 ng IC si George Oconer ng Navy, pangatlo at pang-apat sina 7Eleven Cliqq-Air21 by Roadbike Philippines riders Rustom Lim at Marcelo Felipe, ayon sa pagkakasunod, habang lumagpak sa fifth place si Aquino.
Isusuot ni Bordeos ang Red Jersey paglarga ng 128.5-km. Lucena-Antipolo Stage Five.
- Latest