Aquino hinablot ang Red Jersey
NAGA CITY – Dumating na ang araw na pinakahihintay ni Jerry Aquino, Jr. ng Scratch It.
Ito ay ang maisuot ang Red Jersey.
Bumanat sa huling 200 metro ng karera ang 27-anyos na si Aquino para sikwatin ang panalo sa Stage Three ng LBC Ronda Pilipinas 2020 na nagsimula sa Legaspi City at nagtapos sa Panganiban Drive.
Inirehistro ng tubong Makati City ang dalawang oras, 47 minuto at 12 segundo sa 119 km. race sapat para maagaw ang overall individual classification kay Stage One winner Mark Julius Bordeos ng Bicycology Shop-Army.
Aminado si Aquino na magiging mainit ang mga mata sa kanya sa paglarga ng Stage Four Daet-Lucena ngayon.
Ngunit hangad lamang niyang maisuot ang Red Jersey.
“Okay lang kahit maagaw agad nila, ang importante naisuot ko na itong red jersey, first time ko po eh,” ani Aquino na nakuha rin ang unang stage win sapul nang sumali sa Ronda.
Nakalaban ni Aquino sa kaskasan sina Ronnel Hualda ng Go For Gold, Dominic Perez ng Army at Aidan James Mendoza ng 7Eleven Cliqq-Air21 by Roadbike Philippines.
Ayon pa kay Aquino, napansin niyang mahigpit ang bantayan ng Standard Insurance-Navy at 7Eleven kaya sinamantala niya ito upang makalusot sa mga tigasing siklista.
“Pinanood lang namin sila (711 at PNSI) kasi sila ‘yung naglalaban eh. Sumunod lang kami sa likod. Nang pumatag ‘yun talagang pinaghandaan namin,” ani Aquino.
Pangalawang dumating si Hualda, tersero si Perez, pang-apat si Mendoza at pang-lima si Morales sa event na suportado ng LBC at inisponsoran ng Manny V. Pangilinan Sports Foundation kasama ang Versa, 8A Performance, Print2Go, Petron, Green Planet, Bike Xtreme, Standard Insurance, Spyder, CCN, Lightwater, Prolite, Guerciotti, Black Mamba, Boy Kanin, Vitamin Boost, NLEX-SCTEX, Maynilad, 3Q Sports Event Management Inc., LBC Foundation at PhilCycling.
Matapos ang tatlong stages, nalikom ni Aquino ang siyam na oras, 43 minuto at 39 segundo.
Ang mga nasa Top 10 ay sina No. 2 si Bordeos, No. 3 George Oconer ng Navy, No. 4 Rustom Lim, No. 5 Mark Galedo, No. 6 Mendoza, No. 7 Marcelo Felipe, No. 8 Mervin Corpuz ng 7Eleven riders, No. 9 Alvin Benosa ng Celeste Cycles at No. 10 Jester Neil Mendoza ng Army.
- Latest