CJ Perez walang kapaguran
MANILA, Philippines — Walang pahi-pahinga kay CJ “The Baby Beast” Perez matapos sumalang sa isang misyon kahapon.
Kababalik lamang ng bansa matapos maglaro para sa Gilas Pilipinas sa 2021 FIBA Asia Cup Qualifiers kontra sa Indonesia kamakalawa ng gabi, sumabak kaagad si Perez sa ensayo ng Gilas 3x3 team sa Ronac Gym.
Kasalukuyang naghahanda ang 3x3 Nationals para sa 2020 FIBA Olympic Qualifying Tournament na nakatakda sa Marso 18-22 sa India.
Hangarin ng bansa na makapasok sa top 3 para makaabante sa 2020 Tokyo Olympics kung saan ipapakilala ang 3x3 discipline bilang medal sport sa unang pagkakataon.
Sinamahan ni Perez ang iba pang 3x3 team members na sina Moala Tautuaa, Alvin Pasaol at Joshua Munzon at ang reserbang sina Karl Dehesa at Leonard Santillan.
Ginagabayan ang koponan ni Stefan Stojacic, ang batikang Serbian player at ngayon ay magsisilbing Philippine team head coach.
Wala pang 12 oras ang pahinga ni Perez na siyang naging malaking tulong sa malaking 100-70 panalo ng Gilas kontra sa Indonesia noong Linggo.
Nagtala si Perez ng 11 puntos, 7 rebounds, 3 assists at 4 steals sa 30-point win ng Nationals sa first window.
- Latest